Alumna do MUA SANTIAGO premiada pola Fundación Cátedra Mutualidade da Avogacía
Amalia Álvarez Vázquez, alumna da VIII promoción do Máster universitario en Avogacía (campus Santiago de Compostela) obtivo o 2º premio da IX edición dos «Premios á Excelencia» convocados pola Fundación Cátedra Mutualidade da Avogacía, co seu traballo sobre «A liberdade de expresión no exercicio da avogacía. Unha visión actual sobre os seus límites e ponderación», destacando o Xurado o enfoque orixinal e novo do traballo para o exercicio profesional da avogacía. Amalia foi tamén una das cinco mellores alumnas do Máster, destacando polo seu elevado rendemento académico.
O premio ten unha dotación económica de 3.000 €, máis o abono das cotas colexiais dos dous primeiros anos de exercicio e dous anos de cotas gratuítas do Plan Universal da Mutualidade Avogacía. A Fundación Mutualidade Avogacía, ademais, editará un libro recompilatorio de todos os traballos premiados, que se publicará na súa páxina web, así como noutros medios e canles da entidade para difundir e recoñecer o labor dos candidatos seleccionados.
Os Premios á Excelencia teñen o obxectivo de recoñecer, apoiar e incentivar o esforzo daqueles/as estudantes que, na súa preparación específica para o exercicio da profesión de avogado/a, demostrasen un especial rendemento académico. Estes premios lograron posicionarse como un referente no ámbito legal, non só pola dotación económica, senón polo recoñecido prestixio que outorga ser galardoado.
A estes Premios concorren licenciados/as e graduados/as en Dereito que cursasen ou estean a cursar o Máster ou Curso de Acceso á Avogacía en calquera universidade ou escola de práctica xurídica do Estado español. O Xurado está constituído por diferentes membros da Xunta de Goberno da Mutualidade da Avogacía e outras personalidades relevantes do sector xurídico.